العصفورة نيوز موقع إخبارى نسائى
مقالات مشابهة
الزواج يعني المسؤولية واحترام الطرف الآخر، والمشاركة في الحلوة والمرة، فيجب على الزوجة أن تشجع زوجها ليكون الأفضل، ويجب على الرجل أن يهتم بزوجته لتكون أجمل امرأة. وقد يمر بيت الزوجية ببعض الخفقات التي تؤثر على العلاقة بين شريك الحياة والطرف والآخر كان ينتاب الرجل مثلا شعورا بالفشل.
ويجب أن تتعامل الزوجة مع هذه المشكلة بتمهل دون أن تجرح الرجل أو تهين كرامته، وفي نفس الوقت يجب أن ترفع من معنوياته ليصبح رجلا ناجحا يشار إليه بالبنان.
قالت الدكتورة دعاء راجح الاستشارية الاجتماعية والأسرية: “كانوا بيقولوا زمان وراء كل رجل عظيم امرأة، لأن النساء زمان كانت ذكية وبتعرف تشجع جوزها وتحفزه على أنه يتقدم ويتحسن ويتطور، كانت بتبقى فاهماه كويس وبتعرف تلقط نقاط القوة عنده، وتكبرها جواه علشان يكتسب ثقة في نفسه، وبتعرف تلقط نقاط الضعف الي مخلياه فاشل، وتوجهه برحمة وبحب ومن غير ما تكسر مآديفه أو تقلل من قيمته”.
وأضافت راجح في بدوينة لها عبر فيسبوك: “للأسف البنات دلوقت بتقعد تقطم فيه وتعايره وتحسسه أنها مش راضية عن أداؤه، ولا راضية عنه زي الأمهات ما بتعمل بالظبط، يعني مش كفاية عليه أمه وعبارة “دي ذقني لو فلحت” تيجي المدام وتكمل على بقيته”.
وتابعت الاستشارية الاجتماعية: “والنتيجة شباب متلقح في الأرصفة فاقد الثقة في نفسه وإمكاناته ومعتمد على الآخرين، دا غير الإحباط واليأس الي ماليه، وقليل لما تلاقي حد فيهم فالح”.
وأوضحت راجح أن: “الرجل بيشوف نفسه في عيون مراته، لو هي شايفاه كويس هيحس في قرارة نفسه أنه إنسان كويس، ولو شايفاه فاشل ومفيش منه رجا هيشوف نفسه كده برده، والست الشاطرة هي الي تديله ثقة في نفسه بكتر المدح في تصرفاته الي ممكن تعجبها”.
ونصحت راجح الزوجة بتذكير الرجل “بلحظات نجاحه السابقة في أوقات الإحباط.. أنت حققت كذا وكذا وكذا، وقادر تحقق المزيد، وتشجيعه على أنه يتحسن ويتطور، والإيمان بأنه قادر على كده.. أنا متأكدة أنك هتقدر تنجح”.
وشددت الاستشارية الأسرية على ضرورة “التفكير معاه في طرق التحسين والتطوير والمساعدة إن أمكن، والأهم من دا كله أنها تكون راضية عن أدائه مهما كان مش على المستوى المطلوب، لأن ممكن تكون إمكاناته هي كده ضعيفة، ولا يكلف الله نفسا إلا وسعها”.
وأشارت راجح إلى أن “الست الشاطرة بتقدر تعمل من الفسيخ شربات زي ما بيقولوا، بس المهم تتعلم تتواصل معاه بشكل أفضل إزاي”.
